"Гъетер акуна" Римма Гаджимурадова. К1елзавайди Бести Нифтиева.
Римма Гаджимурадова
ГЪЕТЕР АКУНА(Куьруь мах)
Хьана хьанач кьван Дуьня тIвар алай са диде. Идаз Йугъни Йиф тIвар алай кьве велед авай. Абур са-садахъ галаз са чIавузни рекье фидачир, къакъатдай. Гьавиляй абур Дуьня дидеди гьар санихъ акъудна, чара авуна, хъиле гьатайла. Ада веледриз вичин къвалав къведай чIав тайинарна. Дидедал кьил чIугвадайла, Йифе вичив гвай чIулав перде цавун чин тирвал акайдай, алем зулуматдиз элкъуьрдай. А чIавуз инсанрин рикIера кучIун гьатдай.
Йугъ и кардал эсиллагь рази тушир. Ва са сеферда ада чинеба яз Йиф стхадин пердедай тIеквер акъудна. Гьа чIавалай инсанриз йифен береда гъетер акуна, абурухъ хвешивал акатна.
Гъетер-Йугъ руша цавун чинай акъуднавай тIекверай авахьзавай эквер тир!
